الفنانة التشكيلية دنيا حسن ومشاركتها في معرض Art Fantasia
الفنانة التشكيلية دنيا حسن
التي تبلغ من العمر : 22 سنة طالبة بمعهد نظم
الرسم هواية منذ الطفولة، مع شغف للتعبير عن المشاعر والأفكار من خلال الفن.
برسم فحم وباستيل وحرق ع الخشب وشغاله ع الألوان الاكريليك وحابه اجرب خامات اكتر
واديت كورسات اطفال ورسمت جداري وعملت أوردرات رسم وحابه اطور من نفسي أكثر ف الرسم
اللوحه بتاعتي اسمها (صراع الوقت )
الألوان المستخدمة
باستيل وفحم
“الصورة في المرآة ليست مجرد انعكاس، إنها سرد للعمر.”
فكرة اللوحة:
“اللوحة دي بتعبر عن خوفنا من المستقبل.
فكرتها بتركز على اللحظة دي اللي ممكن الواحد فيها يشوف نفسه فجأة في مكان أو حاله مش قادر يتخيله.
زي ما الشابة دي بتشوف نفسها في المرآة كامرأة عجوز.
ده بيعكس الخوف من التغيير اللي بيحصل مع مرور الوقت.”
“في اللوحة، رسمت شابة بتبص في المرآة، ولما تبص تلاقي نفسها عجوزة. ده عشان يوضح إن الزمن بيعدي بسرعة، وأحيانًا بنشوف التغيير ده بشكل مفاجئ. اللي بيفكرنا إن الحياة مش دايمًا زي ما كنا متوقعين.”
الألوان والظلال:
“الألوان الداكنة في اللوحة بتخلي فيه جو من القلق والتوتر، عشان توصل الإحساس بالخوف من المستقبل. أما الضوء على وجه الشابة فيوضح فكرة الأمل، وإنه فيه بداية، بينما الوجه في المرآة في الظل بيعكس فكرة التغير والمجهول.”
“اللوحة دي بتعبر عن المشاعر ، من خوف من المستقبل والتغيرات اللي بيجلبها. بس في نفس الوقت، هي دعوة إننا نتقبل الوقت ونتصالح مع مرور الأيام.”
“الهدف من اللوحة إن الناس يشوفوا فيها أنفسهم ويحسوا بمشاعر مشابهة، ويشجعهم على التفكير في كيفية مواجهة التغيرات اللي بيجلبها الزمن.”
رأيي ف المعرض كالعادة الاء بتعمل عظمه دي تاني مرة أشارك معها وان شاءالله مش اخر مرة
تنظيم المعرض واختيار المكان وكل حاجة كانت تحفه وبتمنى لها ديما النجاح والتقدم وكل مرة يكون المعرض احلى من اللي قبله مبسوطه اني بشارك معها والمعرض كان في شغل جميل جدا وفعلا كل اللي موجودين فنانين بجد كل واحد ابدع بطريقته الخاصة واتمنى ليهم النجاح ديما يارب وان شاءالله ف كل معرض سوا
إعداد /مي جمال
