الفنانة التشكيلية أسماء علي ابو اليزيد ومشاركتها في معرض شغف وفنون

اسمي
اسماء علي ابو اليزيد
عمري ٣٩ سنه
طبيبة اسنان
عايشة في القاهرة

من زمان بحب ال handmade بكل صوره اتعلمت اشتغل كروشيه وانا صغيره في المدرسه ولحد وقت قريب باعمل قطع جميله بالصوف والخيوط لاولادي ولزوجي
ولما ولادي دخلو المدرسه بدأت اشارك معاهم شغل الكرافت وازاي نعمل بروجيكت سوا ونستخدم خامات وافكار مميزه تخلي البروجيكت مميز ومختلف وبنفرح بالنتيجة سوا واي رسومات او تلوين كان بيظهر حبي لتنسيق الالوان ونطلع شغل جميل بخامات متوفره وافكار جديده

عرفت اني موهوبه في شغل الديكوباج لما بدأت اعمل قطع والناس تسألني شغلك جميل عملتيه ازاي بعدها عرفت اني عندي رؤيه خاصه بيا الحمد لله بتظهر في العمل اللي بيطلع مني وده بفضل الله سبحانه وتعالي

فن الديكوباج ازاي نستخدم الالوان والدهانات في عمل قطع فنيه واستخدام خامات زي النابكن والترانسفير وورق الليزر لاضفاء لمسه فنيه علي القطع وتكون عمليه وتستخدم في حياتنا العمليه
اول خطوة اني بدأت افكر ازاي استخدم الفن ده في عمل هدايا هاند ميد للاقارب والصحاب و بدأت اهادي اصحابي وقرايبي في كل مناسبه وبدأ شغلي يعجبهم ويحسو بقيمته فعلا وانه معمول برؤيه فنيه خاصه بيا وبدأو يشجعوني اكمل واتعلم اكتر وحضرت كورسات كتير مختلفه لاكتر من تكنيك وبعدها بدأت افكر اني اصور طريقه الشغل عشان ادي للناس افكار لو حابين ينفذوها برؤيتهم هما

الصراحة كله بيشجعني ولادي وزوجي واهلي والدي ووالدتي واخويا وسايبيني براحتي اشتغل في البيت كإنه ورشة
واي عمل بيطلع بيقولولي رأيهم ويقولولي تسلم ايدك
بدأت من حوالي سنتين بعد ما اخدت كورس ولقيت نفسي باتعلم بسرعه وبدأ يزيد عندي الشغف بتجديد القطع القديمه واعادة استخدامها بشكل جديد
اني الحمد لله اتقنت التكنيكات الخاصة بشغل الديكوباج ولسه باتعلم وباجرب جديد وبدأت اقدم محتوي مفيد للناس ويساعد في تقديم افكار لاعمال فنيه اي حد يقدر يعملها

نفسي اقدم اكتر واعمل محتوي غني بالاعمال الفنية واكون اكثر اطلاعا علي الفن من خلال المعارض الفنية والثقافيه والتبحر اكتر في مجالات الفن

صورة العمل :-

معرض الابتكار الفني من اجمل المعارض اللي شاركت فيها والمنظمين وبالاخص الفنانة آلاء الرفاعي
وفخورة بالتكريم وده كان للمرة التانيه اشارك فيه

إعداد/مي جمال