آية الفخراني توثق سحر الريف بعدستها في معرض 360 فن للتصوير الفوتوغرافي

أنا آية الفخراني، طالبة بكلية التربية الرياضية – جامعة المنوفية، فرع شبين الكوم.

رغم إن دراستي بعيدة عن مجال التصوير، إلا إن الكاميرا هي شغفي الحقيقي.

بحب أوثّق اللحظات البسيطة والجمال اللي بتشوفه عيوني، خصوصًا في الريف والطبيعة، لأنهم الأقرب لقلبي وبيمنحوني إحساس الراحة والسلام النفسي.

التصوير بالنسبة لي مش مجرد هواية، لكنه نعمة من ربنا،

بقدر من خلالها أعبّر عن عظمة خلقه وإبداعه في تفاصيل الحياة.

بحس إني فعلاً بتنفس وأنا بصوّر، وكل المشاعر الحلوة في حياتي دايمًا مرتبطة بالكاميرا؛

سواء وأنا بوثّق مشهد طبيعي، أو بصوّر حد وبيفرح بالنتيجة، أو بحفظ ذكرى جميلة لحد بحبه.

فلسفتي الفنية

التصوير بالنسبالي إحساس قبل ما يكون لقطة، هو حكاية بتتقال من خلال عيني ونظرتي الخاصة.

بتمنى إن كل صورة أشاركها تكون سبب بسيط في نشر إحساس جميل أو لحظة تأمل،

وتخلي اللي يشوفها يفتكر إن الجمال حوالينا دايمًا… بس محتاج عين تحس وتشوف.

فكرة العمل المشارك في معرض 360 فن

فكرة عملي بتدور حول إبراز الجمال في التفاصيل اليومية البسيطة

اللي ممكن نعدّي عليها كل يوم من غير ما نحس بيها.

من خلال الصورة حبيت أنقل روح الريف، الهدوء، والبساطة اللي بتميزه،

وأظهر الجمال الحقيقي في المشاهد العادية المليانة حياة ودفء.

“أنا مؤمنة إن التصوير مش بس لقطة حلوة، لكنه رسالة إحساس

تخلي اللي يشوف الصورة يعيش اللحظة زي ما أنا حسيّتها وأنا بصوّر.”

تفاصيل العمل:

الطول: 40 سم

العرض: 30 سم

الخامة: تصوير فوتوغرافي

تجربة المشاركة في معرض 360 فن

كانت مشاركتي في معرض 360 فن تجربة غنية جدًا ومليانة طاقة إيجابية.

حسّيت إن شغفي بيتقدّر، وإن كل تعب في لحظات التصوير والتجهيز طلع في صورة بتتحب.

وجود النقاد والفنانين شجعني أتعلم أكتر، وأشوف تجارب ملهمة بتخليني أطوّر من نفسي.

التصوير بالنسبالي هو طريقتي في الحكي والتعبير عن الجمال اللي جوايا.

كل صورة بالنسبة لي دعوة للتأمل، ورسالة بسيطة تقول إن الحياة حلوة بتفاصيلها الصغيرة.