الفنانة التشكيلية أسماء علي ابو اليزيد ومشاركتها في معرض Be Art
اسماء علي ابو اليزيد
عمري ٣٩ سنه
طبيبة اسنان
عايشة في القاهرة
من زمان بحب ال handmade بكل صوره اتعلمت اشتغل كروشيه وانا صغيره في المدرسه.
لحد وقت قريب باعمل قطع جميله بالصوف والخيوط لاولادي ولزوجي ولما ولادي دخلو المدرسه بدأت اشارك معاهم شغل الكرافت.
ازاي نعمل بروجيكت سوا ونستخدم خامات وافكار مميزه تخلي البروجيكت مميز ومختلف.
بنفرح بالنتيجة سوا واي رسومات او تلوين كان بيظهر حبي لتنسيق الالوان ونطلع شغل جميل بخامات متوفره وافكار جديده.
عرفت اني موهوبه في شغل الديكوباج لما بدأت اعمل قطع والناس تسألني شغلك جميل عملتيه ازاي.
بعدها عرفت اني عندي رؤيه خاصه بيا الحمد لله بتظهر في العمل اللي بيطلع مني وده بفضل الله سبحانه وتعالي.
فن الديكوباج ازاي نستخدم الالوان والدهانات في عمل قطع فنيه.
استخدام خامات زي النابكن والترانسفير وورق الليزر لاضفاء لمسه فنيه علي القطع وتكون عمليه وتستخدم في حياتنا العمليه.
اول خطوة اني بدأت افكر ازاي استخدم الفن ده في عمل هدايا هاند ميد للاقارب والصحاب.
بدأت اهادي اصحابي وقرايبي في كل مناسبه.
بدأ شغلي يعجبهم ويحسو بقيمته فعلا وانه معمول برؤيه فنيه خاصه بيا وبدأو يشجعوني اكمل واتعلم اكتر.
حضرت كورسات كتير مختلفه لاكتر من تكنيك وبعدها بدأت افكر اني اصور طريقه الشغل عشان ادي للناس افكار لو حابين ينفذوها برؤيتهم هما.
الصراحة كله بيشجعني ولادي وزوجي واهلي والدي ووالدتي واخويا وسايبيني براحتي اشتغل في البيت كإنه ورشة واي عمل بيطلع بيقولولي رأيهم.
بدأت من حوالي سنتين بعد ما اخدت كورس ولقيت نفسي باتعلم بسرعه.
بدأ يزيد عندي الشغف بتجديد القطع القديمه واعادة استخدامها بشكل جديد.
الحمد لله اتقنت التكنيكات الخاصة بشغل الديكوباج.
لسه باتعلم وباجرب جديد وبدأت اقدم محتوي مفيد للناس ويساعد في تقديم افكار لاعمال فنيه اي حد يقدر يعملها.
نفسي اقدم اكتر واعمل محتوي غني بالاعمال الفنية واكون اكثر اطلاعا علي الفن من خلال المعارض الفنية والثقافيه والتبحر اكتر في مجالات الفن.
صورة العمل….
شاركت ب تابلوه ديكوباج وملامس بيعبر عن مشاعر لفلسطين
المعرض كان كله لوحات مميزه واعمال فنية مختلفه ومتنوعه ومنظم
والحقيقه القائمين عليها كانو بيجتهدو جدا عشان يطلع بأحسن صورة
